Lampung 7

 Kelas VII

Assalamualaikum...

Dirumah saja selalu jaga kesehatan, cuci tangan dengan sabun dan jangan lupa beribadah kepada Alloh SWT.

Menemukan kata dasar dan kata berimbuhan dari wawaghahan fabel

Kucing Diancam Mughidni

Adek jaman tumbai kucing jama lemaweng kak besahabat. Mulani lemaweng besahabat jama kucing makkung pandai api-api. Ia ghisok dihina jama binatang bagheh. Ulih sebab sina lemaweng nyepok guru sai dapok nawai ya macom-macom ilmu ghik kesaktian.Di pulan kucing sangun dighabai jama binatang-binatang bagheh. Lamun kucing liyu di suatu pok pasti binatang-binatang sain lain ngeni hormat jama ia. Kipak jughena kucing mak pungah, ia pagun ibah hati, mula binatang sai bagheh geghing jama ia.

Suatu ghani kucing ngeghatongi lemaweng sadalih miwang. “Hei lemaweng ulah api niku miwang?” Kucing ngelulih, kidang lemaweng ngehening  gawoh, kucing ngelulih luwot,”Cuba niku haniko, sapa sai ngegangumu?”Lemaweng laju cawa,”Nyak dihina!” ia mak beghani ngeliyak mata kucing sai tajom. Kucing ngeghediki lemaweng ghik ngelulih luwot,”jadi niku dija haga api?”

“Nyak haga belajagh jama niku”. Kucing lalang ngedengi, ghik ia ngelulih,:Api mak salah?”  Lemaweng nimbal ia mak salah pilih. Kucing lalang luwot sandalih ngeliyak ghik-ghikni gegoh ulai, kuyuk, beruang, babui, ghik rusa.“ Ulih api niku mak beguru jama jelma gawoh?” Lemaweng ngegeleng-gelengko uluni.

“Niku kak mengan?” kucing ngelulih, ulih ia ngeliyak lemaweng jak jeno menguni betongni gawoh. Lemaweng cawa bahwa kak telu ghani ia makkung mengan. Kucing ngayun rusa kenyin ngeni kanikan untuk lemaweng secukupni.Lemaweng senong nihan neghima kanikan sina.Ia mengen bangik nana. Binatang sai lain nontonni. Ulah ngeghasa geli ngeliyak gegunjoghn lemaweng sai mak ngedok nyepok kanikan tenggalan.

Seghadu mengan lemaweng kedugok, ia pedom telelop di ghedik kucing. Waktu ia minjak mak ngedok binatang lain kecuali ia ngeliyak kucing di bah batang lagi mainko ikok, cakar ghik kumisni. Lemaweng ghabai ngeghediki kucing. Kucing kak pandai api tujuannilemaweng sina. “Jemoh gawoh jam telu niku mit dija.” Lemaweng nughut gawoh jama api sai dicawako jama kucing. Jemoh ghanini kucing ngughau ghik-ghikni, ia kilu pendapat tettang tawaran lemaweng sai haga beguru.

“Wat api ya?” beruang ngelulih. :Goh ji kanca-kanca lemaweng sina haga beguru jama nyak kidang makkung kujawab, nyak kilu pendapat kuti.”“Dang teghima”, cawa ulai tegas. “Benogh, dang diteghima!”, cawa beruang ngedukung ulai. “Lemaweng sina ghisok lupa asal usulni” cawa rusa.Kanca-kanca kucing mak ngedok sai setuju lamen lemaweng jadi mughidni.

Taganko gawoh ia nyepok guru sai bagheh, seghadu mansa ilmu ia haga matiko guruni, pokokni dang dikeni hati, naan ya haga kilu jantung.”cawa kuyuk ngingokko.Seghadu ngedengi pendapat ghikni kucing akhirni cawa,”indai kanca seunyinni dengiko ya…. Nyak haga neghima ia jadi mughid, ki ia jahil nyak sai betanggung jawab!”“Yah…… gham haga teancam”, cawa babui biyak hati.Walau biyak hati tiyan neghima keputusan sina.

Sesuai jama janjini dibi sina lemaweng ghatong ngusung kanikkan untuk calon guruni.“Jadi niku temon-temon haga beguru?”Benogh guru” Lemaweng nimbal.”Sanggupkah niku memenuhi syarat-syaratni?”Tanya kucing, “Api syaratni guru?”“Pertama niku mesti rajin bekeghja, keghua ilmu sai niku teghima dang digunako untuk kejahilan, dang pungah, sai ketelu lamun niku ngelanggar niku haga dikutuk jadi binatang sai paling jahil di bumi sinji, sanggup!”.“Sanggup”, lemaweng nimbal.

Kucing mulai ngelajagh lemaweng.Pertama kucing ngelajagh ilmu tegagh sai geluk ghik cagha ngelunccak.Pelajaghan sina dipahami jama lemaweng dilom waktu ghua bulan.Ilmu keghua iyulah cagha ngehambau kak jawoh, ilmu sina dikuasai selama setahun.Seghadu sina latihan dihentiko jama kucing ulih tinggal ghua ilmu sai makkung dikuasai kucing yakdo nguatko tanggai-tanggai ghik ngeluncak di batang.Lemaweng miwang teghus kilu tulung kenyin kucing geluk-geluk nughunko ilmuni jama ya.Akhirni seghadu ghua puluh pitu bulan ya kilu jama kucing. Kucing ngughau beruang supaya ia ngelajagh lemaweng cagha nguatko tanggai-tanggaini. Sebenoghni beruang kebiyaan, ulih kucing memaksa teghus akherni ngelajagh munih.

Ganta tinggal ilmu cakak batang ghik ngeluncak di unggakni.”Ajaghi nyak ilmu sina” kilu lemaweng.“Niku makkung waktuni neghima ilmu sina” jawab kucing.Lemawengteghus memaksa “Ghepa guru?” Kucing tegas “Mak!”.“Guru kak mikighkonni?” lemaweng ngelulih luwot. Kucing kak pandai jama pertanyaan lemaweng, kucing mak cawa luwot.“Ganta nyak mak ngakui niku guruku, nyak kak kuat, niku musuh utamaku.Igok sina!” hani lemaweng marah jama guruni.“Api hanimu?” kucing marah munih.Nyak haga matiko niku”.“Mughid tebel podak…..” kucing tambah marah.Lemaweng keliyakan podak aslini, kucing laju ingok jama nasehat kanca-kancani sai kak saka.Lemaweng laju haga nakop kucing, kucing ngehindar, lemaweng nerkam luwot.Kucing langsung tegagh ghik bejamuk di pucuk batang sai paling ghanggal. Lemaweng mak pandai cakak batang, ia nunggu di bah batang, akhirni ia besumpah “Hai kucing nyak besumpah haga matiko niku dipa gawoh jama keturunanmu, malahan kotorannu haga kukanik!” “Ngedengi sumpah sina kucing keghabaian, hampegh gawoh ya tiyak. Laju ia tughun seghadu lemaweng ninggalko pok sina.

Mitagh jak sina lemaweng beghubah, kanca-kancani ia anggop musuh ghik ia mangsa. Kucing mak tenang di pulan, akherni ia kughuk pekon ghik begaul jama jelma. Ulih sumpah lemaweng sina haga nganik kotoghanni, unggal kucing missing ia nimbun kotoghannni jama tanoh. Sampai ganta lemaweng mak dapok cakak batang gegoh kucing, ulih ia makkung dilajagh jama kucing.

Tugas!

Tulisko masing-masing 5 kata dasar ghik kata berimbuhan anjak

wawaghahan fabel!

Terimakasih. Wassalamualaikum...